dream

dream
am yours

الخميس، 9 أغسطس 2012

وجع تيك اواى







اه هكتب وانا مخنوقه...بكم الكوابيس اللى بقت بتطاردنى ف نومى من غير سبب...كوابيس عن حاجات مش عارفه الاقيها وشوارع بتوه فيها وعن حاجات بضيعها وبتوه منى وببكى عليها.....هكتب عنك..لانى من يوم ماعرفتك وكل حياتى اتغيرت..حبيتك من اول يوم اتكلمنا فيه وكأنى اعرفك من سنين.....ولا اقولك مش هحكى ف كلام حكينا فيه..تقريبا انت بقيت بتمل وانا زيك قربت امل وازهق منى...
معلش بقى انا لما بحب بفضل اعيد وازيد ف نفس الكلام اللى يزهق


مش لاقياك..زى اى حاجه تاهت منى الايام دى ومش لاقياها انت كمان بتتوه.....بدور عليك..مشغول....ولما استناك عشان نتكلم تتشغل بالكلام مع غيرى...منكرش ان قلبى بدأ يزهق... بدأ من غيابك يتعود على غيابك....بدأت ارجع نون تانى اللى بتعمل الحاجات لوحدها من غير حد..بدأت ارجع تانى اخرج وانا مش بستئذن غير ماما استئذان عشوائى...


بقيت بحاول اتأخر بره يمكن تحس غيابى ولا ماما تكلمك تشكيلك منى فتكلمنى وتقوللى بلاش تتأخرى بره انا بخاف عليكى..تفتكر انت بتخاف عليا؟؟؟تقريبا لا...ايون منا من يومى زى ما بابا كان بيقول راجل ميتخافش عليا ...بس انا عايزه يتخاف عليا.عايزه ابقى بنت بيتخاف عليها منك....اومال انا وافقت على انى اتخطب ليك ليه؟؟فكرك كان هدفى اعيش الوقت معاك حب وضحك اربعه وعشرين ساعه بس؟؟لا ...نفسى ابكيلك انت بس مش ادفن راسى ف المخده وابكى زى منا اتعودت وحدى....نفسى اجى احكيلك عن حاجات واجعانى وتسمعنى ...واسمعلك صوت بيناقشنى مش تقوللى معلش يا حبيبتى مش عارف اقولك ايه...قوللى تعالى نفكر سوا ونلاقيلها حل يمكن لو حاولت تشاركنى بصوت عالى نلاقى حل....نفسى تقوللى مترجعيش البيت دلوقتى وحدك وانا هاجى اوصلك ولا قوللى متروحيش المكان ده وحدك ..انا جاى معاكى....كلمنى مره وانا خارجه قوللى رايحه فين وراجعه امتا....شوفنى نفسى ف ايه..قوللى ان فى حاجه ف فاترينه شفتها لايقه عليا ..انشالله تكون بسكوته بربع جنيه....ليه فجأه بقى بيننا فجوه....ليه فجأه اتاخدت منى ومش لاقياك.....بستنى للفجر عشان اعرف الاقيلك وقت اكلمك فيه وبردو تروح تكلم غيرى...مهما كان غيرى ده يكون حتى لو كان امى...ليه بتدى من وقتى معاك لغيرى؟؟؟انا معاك بخلى وقتى كله ليك.....ليه رجعتنى تانى ابقى وحدى...ليه رجعت تانى افكر وحدى واحلم وحدى واحط راسى على المخده واعيط وحدى ورجعت احلم بخيالك يشاركنى حياتى؟؟؟؟عارف ...مش قادره اوصفلك كم الوجع جوايا أد ايه....غيابك جرحنى وانا طبعى بسكت.....
ليه بقيت بحس انى غريبه...اما تزعل بعرف من غيرى انك زعلان..واما بتتخنق من حاجات ..بردو غيرى بيعرف قبلى...هو انا وجودى ف حياتك ايه؟؟؟اباجوره يعنى؟؟؟ولا شوال بطاطا مرزوع ف اى حته وخلاص.....دبلتك ف ايدى دى كانت ليا؟؟تفتكر كانت ليا؟؟؟واما هى ليا ليه حاسه انك ف وادى وانا ف وادى والدبلتين بتوعنا ف وادى تالت ليه؟....

اول مره فراشتك تحس ان فى حد كسر جناحها ومش عارفه تطير....
كنت بطلت تكتبلى ولو سطر عنى...وانا بطلت اقولك اكتب...مبقتش بحس حلاوتها لما بتكتبلى لما انا اقول.....بطلت تدورلى على اغانى تعجبنى وتقوللى اسمعيها..بطلت احس انى حبيبة حبيبى...زعلى مش عشان مش لاقيه اصحابى زى منتا فاهم..انا لو دورت هلاقى كتير اخرج معاهم وهيتبسطو اوى..بس اوقات بيبقى نفسى انت تقوللى تعالى نخرج..تقوللى نفسى اشوفك..تفتكر بوحشك وبيبقى نفسك تشوفنى؟؟؟؟معتقدش..بجد مبقتش حاسه كده....اما بقولك انى مستعده احذف اى شخص عشان انت متزعلش تقوللى لا طبعا انا مش هلغى شخصيتك..مش فاهمه انا اومال لو انا مش هفكر ف زعلك المفروض افكر ف زعل مين؟؟؟ ليه محسسنى انى عندى وقت فراغ بطلع نكده عليك؟
ليه بتنسى تتصل بيا ومش بتعملها الا لو انا رنيت او لو قلتلك اتصل؟؟؟ليه كل الوجع اللى زرعته فيا ده ..انا بموت فى صمت ومش حد عارف....عاجبك اللى عملته فيا ده؟؟؟؟خلاص هتعود على ان نون وحدها تانى...مبروك علينا خطوبه رجعتلى الوجع اضعاف

الغياب...افة الحب...وسقم الروح

ابحث عنى..انا فى مكان ما..اغوص وانتظر يديك..


انا فى مكان ما انطفىء وانتظر عينيك..


ابحث عنى...انا فى مكان ما اناديك وانتظر مجيئك..




انا فى مكان ما..احبك..
امنحنى وهج عينيك ليكون وطنى..وطنى الوحيد..ضد اوطان البشر..
اه امنحنى حبك..فلا ادخل حربا من حروبهم ولا يأتينى خبر السلام...ابدا
مد لى يديك..حبيبى مد لى يديك..من فوق حقيقة هذا العالم..
حبيبى...فلا ادخل حربا من حروبهم ابدا
احبك..ابحث عنى
ماجده الرومى

هناك 4 تعليقات:

Baskouta يقول...

بطلت احس انى حبيبة حبيبى.
الجملة دي لخصت كل الكلام والاحساس

احيكي انك قدرتي تحكي وجعك بالشفافية دي
ربنا يطبطب على وجعك

noon kiko يقول...

بصى يا بسكوته انا مش بعرف اخبى..وكنت قاصده كل حرف عشان بحبه اوى ولازم كنت اوصله كلامى بطريقه مش مباشره..وانا قدامه مش بعرف اقول ولا حرف...انا ممكن اكتب احساسى اكتر منا بقوله.....حبيبتى ..جميل اننا نكتب والاجمل اننا نتحس.....مبسوطه انك عديتى على مدونتى :)))))

Unknown يقول...

برده هفضل اقولك بحبك و أقطع كلامك :)

noon kiko يقول...

وانا هفضل اقول بعشقك يا كيكو