dream

dream
am yours

الخميس، 17 ديسمبر، 2009

صفقات زواج


امبارح كان يوم غريب..رجعت م الشغل وعلى غير عادتى رحت شغلت التليفزيون اللى نسيت حتى قنواته..ولقيت فيلم اجنبى شغال على دبى ون..اسمه

when man loves awomen

البطل آندى غارسيا والبطله ميج رايان وفيه ميج رايان هى زوجة اندى وام لطفلتين وهى مدمنة كحول يتفانى زوجها ف مساعدتها للشفاء من ادمانها ..قصة حب منتهى الروعه..بكتنى ف الاخر لما هى حست انها من كتر اخطائها عايزه تبعده عنها قبل مايكرهها ف عز ماهو بيموت من فراقها وتنتهى اخر لقطه وهو عندها بيسمع كلامها بعد العلاج عن احساسها الرائع ناحيته وبيروحلها ويقوللها وانا كمان كنت بحس انى قصرت معاكى ..كل واحد منهم عايز يجيب الغلط فيه عشان مايجرحش التانى..طبعا دى افلام ...النهارده للمره التانيه ارجع من بره والاقى اختى مستنيه فيلم هندى وقعدت اتفرج معاها على مليونير الحى الفقير..

معلش

انا لازم اكتب البوست ده..رغم ان كلامى اول مره اقدر اقوله علنى كده..بس بجد حد يعرف يعنى ايه ان بنت تتحب؟البنات بس هما اللى يقدروا يحسوا بمدى اهمية ده..عارفين يعنى ايه كل يوم حد يصحى وهو بيدعى انه يتخبط ف حد يحبه ويتمناه جمبه طول العمر؟يعنى تكون جزء من حياة حد مسئول عنها

اصعب احساس لما تكون مجرد سلعه بيتفرجوا عليها العرسان واللى يعجبه الشكل هيشيل واللى مش هيعجبه هيركن البضاعه على جمب لحد ما ييجى غيره يعاينها

كل فتره تتحط البنت ف نفس الموقف

تقعد ف الصالون تقدم مشاريب سخن وساقع وتورته وكيك الباشا ف الصالون زى الديك الشركسى بيراقب ..ولو عجبه الحال بيرجع تانى معجبهوش بياكل ويشرب ويمشى ويقول عدولى

وتبدا البنت تعانى ف صمت من مرارة الرفض..تقف قدام مرايتها كل يوم وتبصلها باستغراب..هى مش وحشه واخلاقها معروفه انها بميت راجل واى حد بيقول عنها كلام حلو لكن ساعة الجد بنتحط ف كفة مطلوب تكونى فائقة الجمال والمشكله ف همسات اللى حواليها اللى بتبقا من تحت لتحت وصعبانه عليهم
كل كام يوم تمر بنفس الشعور وتسكت ..تشوف نظرات التعجب ف عيون اللى حواليها واما تتخنق خالص تعمل عبيطه..ولو حد مايعرفهاش واتعرفوا مثلا ف الشغل عليهامن زميلاتها وسالوها ليه رغم انك اموره وشيكواخلاق ومتجوزتيش لحد الان؟سؤال غبى..ترد تقول نصيب..محدش يقتنع..تكدب وتقول برفض عشان مش مناسبين يردوا بغباء ويقولوا خدى بالك انتى بتكبرى ودلوقتى بتختارى لكن بكره هيتفرض عليكى اى حد والسلام

هى البنت بتختار امتا؟

مش لما الراجل يختارها الاول

يعنى هى مابتختارش

وموافقتها عليه اوقات بتكون اجبار واهو ضل راجل

واما ترفض ان جوازها ده يتم على انه صفقه

تعنس

ليه؟؟

البنت دلوقتى بتتقيم ف نظر العريس بناء على ايه؟ماينفعش يشوف جمالها اللى جواها وبعدين يحكم؟

والله امبارح صحبتى كلمتنى من اسيوط بتقوللى كان جاى عريس ومحترم جدا واخلاق وبعد ماحضرنا نفسنا اتصل وقال مفيش نصيب عشان شاف واحده احلى وعجبته..مش هقول انى واقفه ف صف صحبتى عشان هى صحبتى..بس والله البنت تتحب..بس اللى يعرفها
وهى اموره عاديه بس اموره

رغم ان الاحلى منها دى دى مجرد شكل خارجى

ومحدش من الشباب يرد ويقوللى جمال الروح اهم...ده كلام افلام عربى

انا عشت عمرى كله بحلم بحدوتة الشاطر حسن وست الحسن والجمال اللى هيسافر عشانها سبع بحور وسبع جبال عشان يتقابلوا وهو عمره ماشافها واهى طلعت حواديت

بس دلوقتى مش زمن الحواديت

انا بجد عايزه اعرف يعنى ايه حب ف نظر شباب اليومين دول...اللى لو واحد منهم حب واحده مش بيتجوزها حتى لو ظروفه بتسمح عشان بيخاف تكون كلمت غيره..ولو ناس زى حالاتنا عمرها ماحبت حد ولا كلمت ولد الناس تتشرط عليهم..وف الاخر بنتقيم على اساس جمالى بحت
وناس تانيه بتاخد الجمال وحتى لو البنت كانت مش مؤدبه بيقول اهم حاجه الجمال واوقات البنت بتمثل دور البريئه فتوقعه حتى لو بالغش وينصلح حالها بعد الجواز
بس ده مش صح

زمان اهالينا علمونا ان اللى تكلم ولد عمره ماهيحترمها ولما سمعنا كلامهم الايام دلوقتى بتثبت عكس نظريتهم ورغم ده مش قادرين نتغير ونبقا زى الواقع

البنت عمر ماكان ليها حق الاختيار والفرصه الوحيده للاختيار عندها

هى انها تختار توافق بدل ماتعنس


بس زمن الحواديت رغم انه مش الزمن الحالى لكن احنا عملناه زمننا وعشنا فيه


ياريت نقدر نعيش الواقع ومنتوجعش منه

بس للاسف انا مقتنعه ان الجواز لو مكنش باعتبارات روحيه ونفسيه ومبنى على تفاهم وحب

يبقا ضل الحيطه احسن

هناك 25 تعليقًا:

خواطر شابة يقول...

صح لسانك والله
تعرفي دماغك زي دماغي باالضبط بجس براحة لما بقرأ لك بأحس اني مش لوحدي لان اوقات بأقول لنفسي يمكن انا مجنونة اني بفكر كده لكن لما بقرأ لك بعرف ان كل اللي انا بفكر فيه صح وان الغلط مش فيا أكثر ماهو في مجتمع حاله مايل وموازينه مختلة
تحياتي لقلمك ودمت بألف خير

واحده من الناس يقول...

انا بكتب والله اللىى ينفع يتكتب لان الواقع يا صديقتى زى مانتى عارفه هو اصعب بكتير والمشكله مش ف اننا نتجوز بقدر ماهى مشكلة احساسنا اللى محدش بيصونه وحتى لو كان نصيبنا اننا نترفض الصعب انك تتحملى نظرات الشفقهى ف عيون اللى حواليكى وكان فيكى مرض هيموتك
انا عايشه جحياتى صح مش بتاثر بكلامهم كتير بس ده ميمنعش ان كلامهم بيوجعنى
حياتى فيها حاجات كتير بس بردو بتفضل ناقصه حاجه ومحدش بيسمعنى عشان اقدر اقول اه براحتى
لازن نتوجعش فى صمت
هو ده اصعب حاجه
وبجد ريحيتينى ان فى ناس زى حالاتى انا وصحبتى وان ده مش شعور فردى

انا بفرح اوى لما بتجينى وياريت تفضلى صحبتى على طول
:)

خواطر شابة يقول...

صداقتك شرف لي وأكيد تسعدني
ان شاء الله التواصل سيدوم مادامت الرغبة مشتركة
تحياتي لك

blue-wave يقول...

اول مرة اتفق معاكى فى رأى:))

عطش الصبار يقول...

ازيك يا نور وحشتينى واللهى
البوست ده بيلقى الضوء على مشكله كل يوم بفكر فيها وبناقشها مع نفسى ومع الاخرين وفعلا فكر الشباب بيعمل لى صدمه معظم الشباب بيدور على الشكل ومش الشباب بس واللهى يا نور لقيت واحده بتدور لابنها على عروسه وكانت من اهم المواصفات المطلوبه انها تكون روشه عرفتى ليه يا نور ليه كم حالات الطلاق اللى فى المجتمع لان الاختيار ما بقاش على اساس القيم ولا الاخلاق ولا الدين ولا على حاجه خالص لكن على اساس الروشنه
قولى لهحبتك انت الفايزه البلاستك والزجاج الملون كتيير لكن اللؤلؤ مصان داخل محارته وسيأتى يوما من يستحق ويقدر
تقبلى تحياتى

واحده من الناس يقول...

خواطر شابه
انا مبسوطه اوى يا صديقتى انك تكونى من الصديقات المقربين كمان
انا مش كل يوم بلاقى حد يبقا تفكيره زى تفكيرى
:)

واحده من الناس يقول...

بلو وايف
(وش مصدوم الاول)
يعنى ايه اول مره تتفق معايا يعنى خلاص كل التعليقات اللى فاتت كنا مختلفين
طيب يا سيدى
هعديها المره دى
بس ع فكره لا يونكن ابدا انها تعدى المره الجايه
:)

واحده من الناس يقول...

عطش الصبار
امى الحبيبه
عارفه انى مقصره جدا فى متابعتك
بس والله بجد انا محتاجه اوى انى احس بوجودك جمبى
انا مش بحكى مجرد مشكله كعادتى ف اختراع المشاكل ع الساحه
لا
المشكله اكبر من كده بكتير
فعلا مبقاش الاختيار دلوقتى بناء على اخلاق ولا ادب ولا عيله
مبقاش فى حديث الرسول عليه الصلاة والسلام"واظفر بذات الدين تربت يداك"
بقا دلوقتى كله مسالة شكل ومظاهر
لو زى ماحضرتك بتقولى اقول لصحبتى انها الكسبانه وان اللؤلؤ يا امى متصان طيب ومين ف زماننا ده بيدور على اللؤلؤ؟
كله حاليا بيحب الاكسسوارات مهما كانت رخيصه
والغالى مبقاش تمنه فيه
احنا بنعانى والله ومش ممكن ابدا اننا نبقا زى باقى البنات حتى لو ده ممكن يكون سبب لفت الانظار لوجودنا
يعنى انا ماينفعش البس بانتاكول وبادى واقول موضه لا تربيتى ولا دينى هتسمح بكده ومعلش لو الجواز هيرسى على كده يبقا يغور الجواز ونموت عوانس احسن

lostlove يقول...

صح كلامك
كل كلمه قلتيها صح الصح
بقنيا بنتقاس بل مقصات
ناقص بكره يحددو وزن العروسه
والي ازيد من 35 متتجوازش :D:D

هو يا تري الشباب دلوقتي اصلا بيعرف يحب
ولا كله بيخاف من العدادات
ماعلينا مهو انتي تتخطبي تبقي مؤدبه وبطبعيتك
رخمه ومش تتعاشر
تغيري من نفسك وتبقي رومنسيه والي هو عاوزه والي يطلبو تنفزيه
اوف عليكي بقيتي جريئه معاه
هههههههههههههههههه جنان رسمي مفيش حد بيعجبو حاجه
ومش شرط يكون في خطوبه حتي لو بتحبي واحد
ممكن يقول وايه المانع مهي عرفتني يبقي ممكن عرفت غيري
وئل جسار قال حكمه
غريبه الناس غريبه الدنيا ديه
ههههههههههههههه
يلا عشان طولت
اتمني التوفيق سلام

Mr.Hazem يقول...

تعرفي انه كلامك وجع قلبي
بجد والله العظيم نفسي اكون سبب التغيير للثقافة السائدة
نفسي اكون سبب باسعاد اي بنت ظلمت بهادي الحياة
انا للعلم اكرة الشباب من هادي الاشياء
قد ينتقدني بعض الشباب ولكن بحكيلوا
دائماً نظلم الفتاة دائماً نقول الشاب بتعيبش دائماً نقول باخد احسن وحده بالدنيا دائماً نقول ونقول ونقول
انتا بتعرف بكل كلمة بتقولها بتجرح كم بنت !!

ليش احنا اصبحنا نعامل المرأه وكأنها جارية وقت ما بدنا بناخدها ووقت ما بدنا بنشوف غيرها
ومش بس هيك ,, حتى التمييز ضدها بيكون بالتعليم وبيكون بالعمل وغيرو امور كتيرة

والله لو عرفتم قلب المرأه بحق وحقيق لكانت الثقافة السائده افضل مما نسمع

منذ 3 سنوات وانا احارب لأجل تعزيز مكانه المرأه في المجتمع وباذن الله سأفني عمري لأجل ذلك ..
بتمنالك التوفيق الك وللجميع
ارق تحية لكِ

واحده من الناس يقول...

lost love
انتى بتقولى فيها..اختى كان وزنها حوالى 75 وكل اللى ييجى ويلاقيها كده يروح ومايرجعش تانى والعكس معايا انا رفيعه ووزنى حوالى 50 واللى ييجى ويلاقينى رفيعه بيروح وبردو مابيرجعش تانى
هههههههههههههههههه
طيب ايه؟
مبقتش يختى عارفه هو الحل ف ايه؟
وعلى رايك تبقى مؤدبه يقولوا رخمه
تبقى رومانسيه يقولوا جريئه ومنفتحه
والله ولا تعرفى هما نفسهم عايزين ايه
حاجه تجنن
وفعلا غريبه الناس
احنا المفروض كلنا نعمل اضراب عن الجواز ويبقا يروحوا يدوروا على عرايس بره
بلاهم
ههههههههههههههه
المهم
كلامكم ريحنى اوى
طلعت مشكلة راى عام
ههههههههههههه

واحده من الناس يقول...

زوما
مش عارفه اقولك ايه
هو انا فعلا مؤمنه ان التغيير بيبدأ بخطوه
ابدأ بنفسك اولا
بس مش ممكن شخص واحد هيقدر يغير وكل اللى حواليا رافضين التغيير
كل الشباب الايام دى رافضين حتى يحددوا هدفهم
بقا رجاله من ورق مع احترامى للشباب اللى معدنهم اصيل
بس بقا الغالب ازاز وورق
حاجات هشه
مش هى رجالة زمان اللى الواحد يتسند عليهم وهو مطمن
احنا محتاجين تغيير كبير اوى اوى يا حازم
وياريت نقدر نتغير

صوت من مصر يقول...

والقناة التالته المصرية جابتلى مسلسل """ مين اللى ميحبش فاطمة "
تخيل انت بقى

واحده من الناس يقول...

صوت من مصر
طيب عايزنى اتخيل عن ايه بالظبط وانا اتخيل؟

amirelhob يقول...

بوست حلو اوى بس انا بصراحه مكلمتوش كلو اسمحيلى هعلق عليه تانى لان النت عندى بيفضل بس هرجع واعلق عليه تانى ايكد ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

P A S H A يقول...

مساء الفل
أقرأ على رواقه وبعدين أستأذنك آجي أعلق ممكن ؟


وتحياتي ع البوست مقدماً

amirelhob يقول...

انا جيت تانى زى ما ما وعدتك وقريت البوست عشان ابقى قد كلامى بس بجد البوست يجنن والمشكله دى فعلا موجوده كتير اوى وانا موافقك مليون الميه على كلامك دا بس صدقينى جزء كبير بدا يغير طريقت تفكيره وميرسى يا قمر على كلامك الجميل دا وعلى انك نورتينى وقولتى رايك ومن قلبى بجد بتمنلك كل خير وسعاده صحه وتوفيق وفرح وابتسامه تتدوم يا رب طول العمر

واحده من الناس يقول...

باشا
انت تشرف ف اى وقت..البيت هنا زى بيتك بالظبط
وشرفتنى بجد
:)

واحده من الناس يقول...

عمرو
بص بقا اولا بلاش السطر الاخير اللى بتحسسنى انك عامل كوبى وباست دى
بتاع بتمنالك
اوك
:)
ثانيا
والله يا عم عمرو ماحد غير طريقة تفكيره الا عدد قليل جدااااااااااااااا
وعلى يدى
:)

lostlove يقول...

فعلا نعمل اضرب وهو ده الحل
هههههههههههههه
يلا بينا يا بنات اضرب ضد الجواز
بس تفتكري كام وحده هتقدر
وهتعرف تفضل ترفض
اصلا الجوز دلوقتي بنسبه للاهل فرصه زهبيه للبنت ما بيصدو واحد يجي وخلصت
خالي الي يشيل يشيل
بيعه وشروه
ومفيش راي اصلا للبنت
ممكن تتفجاء بلي حصل
وتعالي يا بنتي نزل نشتري الدبل
ووالله ده كلام حصل
تحسي انك في عصر الجاهيله
والبنت سلع حاجه بتباع وتشتري
ملهاش راي
ولا اي حاجه
زي اي حاجه في ديكور البيت
سهل يتخلصو منها
مواضيع كتير اوي في الكلام ده
ازا كان مفيش حد بيتادم اصلا
ولا حد بيهتم بل مظهر
ولا جواز مصالح
بقت قضيه كبيره جدا
ومحدش عارف ليها حل
بجد طولت قوي
بس مستنه البوست الجديد بتاعك
تحياتي واتمني التوفيق
ويارب يانعرف نلاقي حل يا نعرف نعمل اضراب:D:D

واحده من الناس يقول...

ههههههههههههههههه
معاكى حق ف كل كلمه كتبتيها وعندنا هنا ف سوهاج بتحصل حاجات من دى كتير وخاصة ف القرى..فعلا البنت ف زمننا ده رغم وصولها لحد المساواه مع الرجل الا انها لحد الان بتصنف زى السلعه وبيبيعوا ويشترورا فيها
والله انا بستغرب على العصر الغريب جدا اللى احنا فيه ده
:)

الحــ ــزين يقول...

تسمحيلى أقولك انك طول عمرك اختياراتك موفقة
بجد موضوعات حضرتك مميزة
دومتى بكل خير

واحده من الناس يقول...

ميرسى خالص يا محمد ربنا يخليك
كل سنه وانت طيب وربنا يجعل السنه دى سنه سعيده عليك وعلى كل الناس

علي أحمد وائل علي الحكيم يقول...

حبيبتي أنا جمعت كام جملة و عاوز بقا ردك عليهم بعد ما أتخطبنا :))))

1 - حد يعرف يعنى ايه ان بنت تتحب؟البنات بس هما اللى يقدروا يحسوا بمدى اهمية ده .... لسه مصره ان البنات هما بس اللي بيعرفوا يعني ايه بنت تتحب ؟؟؟؟
2 - تقعد ف الصالون تقدم مشاريب سخن وساقع وتورته وكيك الباشا ف الصالون زى الديك الشركسى بيراقب ..ولو عجبه الحال بيرجع تانى معجبهوش بياكل ويشرب ويمشى ويقول عدولى .... اتحطيتي في الموقف ده معايا ؟؟؟؟؟
3 - البنت دلوقتى بتتقيم ف نظر العريس بناء على ايه؟ماينفعش يشوف جمالها اللى جواها وبعدين يحكم؟

.... أنتي أيه رأيك , أنا قيمت بناءا علي أيه ؟؟؟؟؟
4- ومحدش من الشباب يرد ويقوللى جمال الروح اهم...ده كلام افلام عربى .... ها أنا كنت كلام أفلام عربي ؟؟؟؟؟
5- انا عشت عمرى كله بحلم بحدوتة الشاطر حسن وست الحسن والجمال اللى هيسافر عشانها سبع بحور وسبع جبال عشان يتقابلوا وهو عمره ماشافها واهى طلعت حواديت ..... بيتهيألي أن أنا و أنتي خلينا الحدوته دي وااااااااااااااااااااقع :))) و لا أيه ؟؟؟؟؟؟
6 - انا بجد عايزه اعرف يعنى ايه حب ف نظر شباب اليومين دول...اللى لو واحد منهم حب واحده مش بيتجوزها حتى لو ظروفه بتسمح عشان بيخاف تكون كلمت غيره..ولو ناس زى حالاتنا عمرها ماحبت حد ولا كلمت ولد الناس تتشرط عليهم..وف الاخر بنتقيم على اساس جمالى بحت .... انا بقا مليش دعوة حبيتك و هتجوزك :))))
7- بس للاسف انا مقتنعه ان الجواز لو مكنش باعتبارات روحيه ونفسيه ومبنى على تفاهم وحب ..... ها جوازنا ايه بقا ؟؟؟؟؟


الخلاصة بقا ...... بحبك يا نور و تجوزك يا نور و مفيش قوة في الدنيا هتبعدني عنك يا حبيبة حبيبك :))

نون..مكعب سكر يقول...

هههههههههههههههههههههههههه يا مجنون...بحبك ده اولا
ثانيا ارد بقى على كلامك

!**انا مقدرش اقولك يعنى ايه بنت تتحب بس اقدر اقولك يعنى ايه انا اتحب...يعنى اكون بفكر ف جمله وتسبقنى وتقولها...يعنى احبك فيحبنى باباك ومامتك وقرايبك وعمك وفجأه يبقى عندى عيله كامله بتحبنى....اتحب يعنى تبقى قادر تمسح دموعى من قبل ماتنزل على خدى...وقادر تصالحنى لو ف يوم زعلت
تحبنى يعنى قلبى يدق باسمك وتكون اغلى راجل عندى ف العالم...اتحب منك يعنى تكون الضحكه منك هديه...ويعنى تكون بحنيتك دى


بالنسبه بقى للديك الشركسى اللى قلت عنه...حبيبى انا محستش ده اطلاقا معاك ولا حسيت اصلا ان فى عريس ف الصالوان..كنت حاسه ان فى حبيب ف الصالون مش مجرد واحد جاى يعاين البضاعه....انت كنت جاى وعارفنى وحاببنى وراضى بيا...مفيش مقارنه طبعا بينك وبين اللى فاتوا..الباقيين اشباه رجال


انت بقى قيمتنى بناء على قلبى...انت محسبتهاش شكل ولا اى مقاييس تانيه..انت وزنتنى بميزان دهب وبصيت لقلبى بس.....وعشان كده انت الراجل المختلف بجد اللى ف العالم


ههههههههههههههههههههلا مش كلام افلام عربى..انت فعلا حسبتها معايا حسبة جمال روح مطلق كمان بشكل مش متوقع..بس انا كمان حبيت روحك من قبل ما اشوفك


حبيبى احنا فعلا صنعنا المعجزه بحدوتة ال
شاطر حسن..خد بالك انت عديت جبال وبحور فعلا..انت جيت من القاهره اللى كنت هتستقر فيها عشان تلاقى حبك اللى عمرك ماقابلته هنا..انا كنت ست الحسن اللى جيت من كوكب تانى عشان تلاقيها من غير ماتعرفها..احنا المعجزه

حبيبى انا كمان حبيتك وهتجوزك ان شاء الله وهكون ام ولادك..وهعمل المستحيل عشان ايدى متسيبش ايدك لحد مانموت سوا


حبيبى..جوازنا فعلا زى منا اتمنيت...باعتبارات روحيه مطلقه..مفيهوش ولا شبهة صفقه..مخدناش بعض الا عن اقتناع..لا عن حب...عن عشق..عن جنون يا جوزى المستقبل :))

الخلاصه يا حبيب حبيبتك..انا بحبك وهتجوزك ان شاء الله...ومفيش قوه ف الكون هتبعدنى عنك ابدا....يا حبيب نون
بحبببببببببببببببببببببك يا كيكو