dream

dream
am yours

الجمعة، 17 أغسطس، 2012

وقت مناسب

حبيبى
بتقوللى الوقت دايما مناسب. عشان اقولك بحبك ف كل وقت وعشان افكر معاك بصوت عالى..منكرش انى بفتقدك زياده عن اللازم وانى لازم اقدر انك مشغول بس انا فعلا بفتقدك وببقى عايزه الاقيك معايا كل وقت...بيبقى نفسى اقولك تعالى شوف رسمى وانا برسم تعالى شخبط معايا وبعتر الالوان معايا على الارض واقعد جمبى وانا بشخبط
بيبقى نفسى نروح مكان على النيل ونقعد نرغى ونضحك ونفتكر ذكريات كتير وحشه وحلوه
نفسى تيجى تاكل العك اللى انا بطبخه او تشرب معايا مج نسكافيه واحد هنقسمه سوا مش عشان بخيله ...لا عشان نتشارك فيه

مش ديما الوقت مناسب عشان نقول اللى بنفكر فيه وغالبا بنضطرنستنى وقت مناسب عشان نقوله.....معاك مش عايزه استنى وقت عشان مش ببقى ضامنه الوقت ولا بآمن للساعات...
فاتت عليا اوقات كتير كنت عايزه اقول لناس بحبهم حاجات كتير والفرصه راحت ومقلتهاش..بابا كان نفسى اقوله كلام كتير معادش ينفع اقوله دلوقتى...
عشان كده بستغل كل فرصه واقولك بحبك وافكر واحلم معاك باعلى صوت

مش عايزه تفوت منى ولا حتى نص فرصه

حبيبى
طماعه انا..مش بشبع منك ولا بكتفى .....بحاول فعلا اقلل جرعة حبى ليك بس مش بعرف لانها عماله تزيد وتزيد.....عارف
اما بخرج واتمشى ف الشوارع بيبقى نفسى تتمشى معايا ونجيب بوريو من عند باباى زى منا بحبه...فى مليون حاجه ببقى عايزه اعملها معاك..بس الوقت مش مناسب..لا انت عندك وقت ولا حتى الوقت اللى عندك ليا هيكفى نعمل حاجه....مش مهم ادينى بحلم اننا نعملها ...كفايه انى وانا بحلم بلاقى حد يشاركنى الحلم..شخص من لحم ودم مش خيال بتخيله وخلاص


حبيبى
عارف...بحاول اعمل خطه لحياتى الجايه تخلينى مشغوله اكبر وقت عشان مفضلش حايمه حواليك بالشكل ده وعماله ادور عليك طول الوقت........بقول عندى كورس الرسم وكمان الدبلومه وشغلى وناويه اخد كورس icdlعشان بكده الوقت اللى يتبقى فاضى عندى يناسب الوقت الفاضى عندك....وبكده محسش بغيابك ولا توحشنى زياده

انا بحبك اوى وده انت عارفه كويس..بحبك وحبك ده هو العامود اللىى  انا مسنوده عليه كويس.....

حبيبى

ف يوم..هنسمع فيروز ومنير سوا ونقف نطبخ سوا.....ونخرج ونتغدى بره سوا.....ونتمشى كتير سوا...ف يوم هننقى لبس العيد سوا... وهنعيد سوا...ف يوم..ربنا يقربه بقى
:D

هناك 8 تعليقات:

علي أحمد وائل علي الحكيم يقول...

عارفة ؟؟؟؟؟ أنتي عرفتي ترسمي أبتسامة على وشي بقالي تقريبا 12 ساعة مبتسمتهاش .... شكرا حبيبتي

علي أحمد وائل علي الحكيم يقول...

اما بالنسبة للوقت المناسب و كده فأحب أقولك أن مش أنتي بس اللي بتعاني لوحدك من كده , أنا كمان بكون محتاجك جمبي و معايا بس مش بينفع و بصبر نفسي و أقول بكره تكون معايا في نفس البيت و مش هنشبع من بعض أبدا و بكره ده هيجي أقرب من ما كنا متخيلين

علي أحمد وائل علي الحكيم يقول...

بحبك

نون..كيكو...حبيبة حبيبى يقول...

ههههههههههههههههههههه اهو انا دلوقتى اللى ابتسمت اوى....معلش بقى اصلك بتوحشنى اوى ومش بعرف اعمل ايه بقى ف حتة انك توحشنى دى....بس انا بحبك اوى وبحس انك انت بس اللى عايزاه يشاركنى تفاصيلى الصغننه.....تفتكر يعنى لو اتجوزنا هتلاقيلى وقت ليا؟؟

علي أحمد وائل علي الحكيم يقول...

أفتكر ؟؟؟؟؟؟ بصي أنتي حرفيا هتكوني معايا طول الوقت

نون..كيكو...حبيبة حبيبى يقول...

ممممممممممممممممممممم طيب صبرنى يارب لحد ما نتجوز واهو هنشوف

Timo.. يقول...

كل عيد.. وانت اكتر حد سعيد :)

غير معرف يقول...

ربنا يخليكو لبعض ويخليني لحبيبي